7-Toun
Artist
عبد العليم بن رابح, من مواليد 22 دجنبر 1987 بالدار البيضاء.
سبعتون بدا المسيرة الفنية ديالو ف 2005, أول ألبوم ليه سماه راخية وصدرو سنة 2008, ولكن للأسف مالقاش نجاح كبير فالساحة الفنية, لكن عبد العليم ماستسلمش وقرر يمكل ويتقاتل.
قرر يخرج بزاف ديال السينغلز وبعض الفيتات مع روابا بحال كابريس, ياسين رامي, ومع عشيرو سبوبو, خوه كيما كيسميه سبعتون.
سبعتون من موراها خرج سينغل تحت عنوان “حبست الراب او هذا الآوترو” وحبس الانتاج ديالو بسبب بعض المشاكل الشخصية, ولكن الحب ديالو للموسيقى وللراب خلاه يرجع من جديد ويفرح الجمهور ديالو.
فسنة 2012 فاش السبعتون غادي يخرح الميكستايب ديالو لي سماها “جوان وبريكة”, وهضر فيها على مواضيع “زنقاوية” وقاصحة, ويمكن نعتابرو هاد الميكستايب كيرجع ليها الفضل فالنجاح ديال السبعتون, حيت من موراها بمدة بسيطة, كان الجمهور ديال الراب المغربي كلو كيعرف السبعتون, ومعظمهم حفظو الكوبليات ديالو وكيرددوهم بقوة فالمهرجانات.
هاذ المنظر تعاود ف 2017 خلال مهرجان البولفار, منين حضر عبد العليم مع صاحبو الفردة, وغنا اخر اغنية خرجها قبل الاعتزال ديالو “آبيل”, والمفاجأة هي أن الجمهور كامل كان حافض الطراك وغناه من القلب ديالو, الشيء لي خلا السبعتون يوقف مصدوم قدام البيبليك ديالو, بل أكثر من ذلك يرجع للراب بالطراك ديالو “L'frite”.
